1Cor 12 | NdeIBE | STEP | Mayelana lezipho zokomoya, bazalwane, kangifuni ukuba lingaze lazi.

1 Corinthians 12

Izipho Zokomoya

1 Mayelana lezipho zokomoya, bazalwane, kangifuni ukuba lingaze lazi. 2 Liyakwazi ukuthi lapho lalingabangakholwayo, ngenye indlela loba njani lakhungeka ledukiselwa ezithombeni eziyizimungulu. 3 Ngakho ngiyalitshela ukuthi kakho okhuluma ngoMoya kaNkulunkulu othi, “UJesu kathukwe,” njalo kakho ongathi, “UJesu yiNkosi,” ngaphandle kokuba kungoMoya oNgcwele.

4 Kulezinhlobo ezehlukeneyo zezipho zakomoya, kodwa uMoya munye.

5 Kulezindlela ezehlukeneyo zokukhonza, kodwa iNkosi yinye.

6 Kulezindlela ezehlukeneyo zokukhonza, kodwa uNkulunkulu munye uzisebenza zonke ebantwini bonke.

7 Emuntwini ngamunye ukubonakaliswa kukaMoya kwenzelwa ukusiza umuntu wonke.

8 Omunye ngoMoya uphiwa amandla okukhuluma ngokuhlakanipha, omunye amandla okukhuluma ngokwazi ngaye uMoya munye lowo, 9 omunye uphiwa ukukholwa ngoMoya munye lowo, omunye uphiwa izipho zokusilisa ngawona lowo uMoya munye,

10 omunye uphiwa amandla okwenza izimangaliso, omunye uphiwa ukuphrofitha, omunye uphiwa amandla okukhuluma izinhlobo ezahlukeneyo zezindimi, omunye njalo aphiwe ukuchasisa izindimi. 11 Konke lokhu kungumsebenzi kaMoya munye oyedwa, njalo ukupha umuntu ngamunye, njengokuthanda kwakhe.

Umzimba Munye, Izitho Ezinengi

12 Umzimba munye, lanxa ubunjwe ngezitho ezinengi; njalo lanxa izitho zawo zonke zinengi, zibumba umzimba owodwa. Kunjalo ngoKhristu. 13 Ngoba sonke sabhaphathizwa ngoMoya munye kulowomzimba munye – loba singamaJuda kumbe amaGiriki, izigqili loba abakhululekileyo – sonke saphiwa uMoya munye ukuba siwunathe.

14 Umzimba kawenziwanga ngesitho esisodwa kodwa ezinengi.

15 Uma unyawo lungathi, “Njengoba ngingasisandla, kangisingxenye yomzimba,” ngalesosizatho alungeke lukhawule ukuba yingxenye yomzimba. 16 Njalo uma indlebe ingathi, “Njengoba ngingasilihlo, kangisingxenye yomzimba, ngalesosizatho ayingeke ikhawule ukuba yingxenye yomzimba.

17 Aluba umzimba wonke wawuyilihlo pho ukuzwa kwakuzakuba ngaphi na? Aluba umzimba wonke wawuyindlebe pho kwakuzanukwa ngani na? 18 Kodwa okuyikho yikuthi uNkulunkulu wabeka izitho zomzimba, zonke, njengayefune ukuba zibe yikho. 19 Aluba zonke zaziyisitho sinye, pho umzimba wawuzakuba ngaphi na? 20 Njengoba kunjalo, kulezitho ezinengi, kodwa umzimba munye.

21 Ilihlo alingeke lithi esandleni, “Kangikusweli!” Lekhanda alingeke lithi ezinyaweni, “Kangilisweli!” 22 Kodwa, lezozitho zomzimba ezikhanya zibuthakathaka ziyasweleka, 23 lezitho thina esicabanga ukuthi kazihlonipheki kakhulu siziphatha ngokuhlonipha okuthize. 24 Izitho ezihloniphisayo siziphatha ngokuhlonipha kakhulu. Kodwa uNkulunkulu wahlanganisa izitho zomzimba njalo usenike udumo olukhulu kulezozitho ezazingelalo, 25 ukuze kungabi lokwahlukana emzimbeni, kodwa ukuba izitho zawo zibe lokuzwelana okufananayo. 26 Uma esinye isitho sibongwa, izitho zonke zithokoza laso.

27 Lina lingumzimba kaKhristu, njalo omunye lomunye wenu uyingxenye yawo.

28 Ebandleni uNkulunkulu wabeka abaphostoli kuqala kulabo bonke, okwesibili abaphrofethi, okwesithathu abafundisi, kwaba labenza izimangaliso, lalabo abalezipho zokusilisa, labo abalakho ukusiza abanye, labo abalezipho zobuphathi, kanye lalabo abakhuluma izinhlobo zezindimi ezehlukeneyo. 29 Bonke bangabaphostoli na? Bonke bangabaphrofethi na? Bonke bangabafundisi na? Bonke bayazenza izimangaliso na? 30 Bonke balezipho zokusilisa na? Bonke bakhuluma ngezindimi na? Bonke bayachasisa na? 31 Kodwa zifuneni ngokutshiseka izipho ezinkulu.

Uthando

Khathesi-ke ngizalitshengisa indlela eyiyo enhle kakhulu.